മലയാളികളുടെ മനസ്സിൽ മയാതെ കിടക്കുന്ന എക്കലത്തേയും സൂപ്പർ ഹിറ്റ് ചിത്രമാണ് സ്ഫടികം. മുണ്ടിരിഞ്ഞ് അടിക്കുന്ന ആടുതോമയേയും ഭൂമിയുടെ സ്പന്ദനം പോലും കണക്കിലാണ് എന്ന് മലയാളികളെ പറയാൻ പഠിപ്പിച്ച ചാക്കോ മാഷും മലയാളികൾക്ക് എന്നും പ്രിയപ്പെട്ടതാണ്.(Spadikam 4k Trailer Released )
ഇപ്പോഴിതാ ചിത്രം റീ റിലീസിന് ഒരുങ്ങുകയാണ്. ആധുനിക സാങ്കേതിക വിദ്യയുടെ എല്ലാ മികവുകളോടും കൂടിയാണ് ചിത്രം എത്തുന്നത്. 4 K പവറിലാണ് ചിത്രം പ്രദർശനത്തിന് എത്തുക. പ്രഖ്യാപന സമയം മുതൽ സ്ഫടികം വീണ്ടും തിയേറ്ററിൽ കാണാനുള്ള ആവേശത്തിലാണ് ആരാധകർ.
ചിത്രത്തിന്റെ പ്രൊമോഷൻ മെറ്റീരിയലുകൾ എല്ലാംതന്നെ സോഷ്യൽ മീഡിയയിൽ വലിയ ശ്രദ്ധ പിടിച്ചുപറ്റിയിരുന്നു. ഇപ്പോഴിതാ ചിത്രത്തിന്റെ ട്രെയിലർ പുറത്തുവിട്ടിരിക്കുകയാണ് അണിയറ പ്രവർത്തകർ. പുതിയതായി ഉൾപ്പെടുത്തിയ ഷോട്ടുകളും മാസ് ഡയലോഗുകളും ചേർത്താണ് ട്രെയിലർ ഒരുക്കിയിരിക്കുന്നത്.
അതി ഗംഭീരം എന്നാണ് ട്രെയിലറിന് സോഷ്യൽ മീഡിയയിൽ നിറയുന്ന കമന്റ്. ചിത്രം ഫെബ്രുവരി 9ന് പുതിയ ദൃശ്യ മികവോടെ പ്രദർശനത്തിന് എത്തും. സ്ഫടികം പുറത്തിറങ്ങി 24 വർഷം ആയിരിക്കുന്ന വേളയിലാണ് ചിത്രം വീണ്ടും പ്രദർശനത്തിന് എത്തുന്നത്.
കഴിഞ്ഞ ദിവസം ചിത്രത്തിന്റെ സെൻസറിംഗ് പൂർത്തിയായിരുന്നു. യു സര്‍ട്ടിഫിക്കറ്റ് ആണ് ചിത്രത്തിന് ലഭിച്ചിരിക്കുന്നത്. 1995 ല്‍ തിയറ്ററുകളിലെത്തിയ ചിത്രം റീ റിലീസിന് ഒരുങ്ങുമ്പോൾ അഭിനേതാക്കളിൽ പലരും കൂടെയില്ല എന്നതാണ് നോവുണർത്തുന്നത് സംവിധായകൻ ഭദ്രൻ പറഞ്ഞു. വിടപറഞ്ഞവരെ അനുസ്മരിച്ച് ഓർമ്മയിൽ സ്ഫടികം എന്ന പരിപാടിയും അണിയറ പ്രവർത്തകർ സംഘടിപ്പിച്ചിരുന്നു.
